ZIZOFUNDWA kusukela kwaGrade R kuya kuGrade 9 izifundo iRobotics neCoding Isithombe: TIMOTHY BERNARD/ANA
SEZIFAKWE ngokusemthethweni ohlelweni lokufundisa izifundo zobuchwepheshe bamakhompyutha iCoding neRobotics.
Lezi zifundo zifakwe ngokusemthethweni emqulwini kahulumeni iGovernement Gazette, muva nje.
Zizofundiswa kusuka kaGrade R kuya kuaGrade 9 kanti seziyingxenye yeCurriculum Assessment Policy Statements (CAPS), okuwuhlelo okufundwa ngalo ezikoleni zakuleli.
UMnyango weMfundo eyisiSekelo waqala ukuhlola ukufundwa kwalezi zifundo kwaGrade R kuya kwaGrade 3, ngo-2021 ezikoleni ezingaphezu kuka-2 000.
UNgqongqoshe walo mnyango uNkk Angie Motshekga, wathi bafuna abafundi bakuleli bafunde izinto ezihambisana nesikhathi wathi yingakho befaka izifundo ezintsha.
Wathi lezi zifundo zibandakanya ukwakha izinto ezifana namarobhothi, nokufunda ngezinto ezithinta amakhompyutha.
KwaGrade R kuya kwaGrade 3, lezi zifundo zizokwenziwa neMaths, kuthi kwaGrade 4 kuya ku-9, zenziwe neMaths, Natural Sciences neTechnology.
Emazingeni aphansi kwaGrade R kuya ku-3, abafundi bazofundiswa ngezinto ezisetshenziswayo uma kwakhiwa amarobhothi.
Kwezithinta amakhompyutha bazofundiswa ukuhlwaya ulwazi kwi-internet.
KwaGrade 4 kuya ku-6, bazofundiswa ukusebenzisa i-internet, izinto ezithinta ukuntshontsha ulwazi lomunye ulwenze olwakho.
KwaGrade7 kuya kuGrade 9, abafundi bazofundiswa amakhono okwakha ama-website nokunye.
UNkk Motshekga waveza ukuthi baqeqeshe abaluleka ngalezi zifundo bahlinzeka ngezinsiza zokufunda nokufundisa kulezi zifundo.
Okhulumela umnyango uMnuz Elijah Mhlanga, uveze ukuthi baqale nezinye izifundo ezintsha ezifana neMarine Sciences, Technical Science, Technical Mathematics nezinye.
Uthe baziqala ngoba zidingwa ngumnotho wakuleli.
“Ukushintsha kwezinto kwenza ukuthi senzise izifundo ezintsha ezikoleni ukuze zihambisane nesikhathi. Siqala nezinye ezithinta amabhizinisi nezinye ezikoleni zamabanga aphezulu,” kusho uMhlanga.
Related Topics: