UMNUZ Kebby Maphatsoe ongasekho emhlabeni, obengumholi weMkhonto We Sizwe Military Veterans Association (MKMVA)
AMAPHOYISA aphenya icala lokuzama ukubulala emuva kokuba owesifazane oneminyaka engu-75, edubuleke emlenzeni ngesikhathi kunenkonzo yomgcwabo kaMnuz Kebby Maphatsoe, owayengumholi wenhlangano esamisiwe, Umkhonto We Sizwe Military Veterans Association (MKMVA).
Kuthiwa owesifazane udubuleke ngesikhathi kukhona abadubula emoyeni kulo mgcwabo. UMaphatsoe, ufihlwe emathuneni aseWest Park, eGoli ngeSonto.
Okhulumela amaphoyisa uBrigadier Vish Naidoo, uthe kuphenywa icala lokuzama ukubulala ngalokhu kudubula, belokuphazamisa imithetho yezenhlekelele (Disaster Management Act regulations).
“ Lolu phenyo ngelokwephulwa komthetho mayelana nesibalo eseqile sabantu abahambela umgcwabo nesikhathi eside owenziwa ngaso. Kukhona nelinya icala lokungaphathwa kwezibhamu ngendlela njengoba kwaba khona abakhipha izibhamu emgcwabeni. Sabe sesithola umbiko othi owesifazane oneminyaka ewu-75 wadubuleka emlenzeni, edutshulwa ngabanye ababedubula emoyeni ngezibhamu,” kuchaza uNaidoo.
Akekho osaboshiwe.
Khona manjalo i-ANC ithe icela amaphoyisa aphenye ngodaba lwabantu abadubula emngcwabeni. Iphini likaNobhala Jikelele we-ANC uNksz Jessie Duarte, lithe kumele abantu bazi ukuthi izibhamu akumele zisetshenziswe endaweni evalelekile njengasemgcwabeni ngoba lokho kuwubugebengu. Wathi balindele ukuthi amaphoyisa athathe izinyathelo ezifanele ngalokhu.
Related Topics: