Vikela isikhumba sakho ukuze ugweme umdlavuza
NGOLWESIBILI kuzobe kuyi-World Cancer Day, usuku okuhloswe ngalo ukufundisa nokuqwashisa abantu ngobungozi besifo somdlavuza. Kwenziwa izinhlelo ezahlukene emhlabeni ukucebisa abantu ukuthi yini okumele bayenze noma bayigweme ukuze baphephe kuso.
Umkhankaso wokufundisa nokuqwashisa ngalolu suku waqala ngo-2008, yi-Union for International Cancer Control, ngenhloso yokweseka umbono we-World Cancer Declaration wango-2008, wekhwelo lokuthi kufundiswe abantu ngobungozi besifo somdlavuza.
Udokotela wesikhumba ozimele uDkt Cebi Sibisi, wenkampani iDr. Cebi Dermatologist, uthe kusemqoka ukuthi abantu bahlale benza izindlela zokuqinisekisa ukuthi isikhumba sabo sivikelekile ngaso sonke isikhathi ukuze bagweme izifo.
“Ukuvikela isikhumba sakho esimweni sezulu esiyingozi akuyona into okumele yenziwe ehlobo kuphela ngoba kusuke kushisa kakhulu. Kepha yinto okumele uhlale uyenza ngazo zonke izinsuku ngoba isikhumba sithikanyezwa yizimo ezahlukene zezulu uma sezinamawala; kungaba wukushisa noma ukubanda, okudinga ukuthi ukubeke eqhulwini ukusinakekela nokusiphatha kahle njalo,” kucebisa uDkt Sibisi.
Eqhuba uDkt Sibisi, uthe kuyihaba ukuthi abanebala elikhanyayo yibona kuphela abalengela engozini yokuphathwa wumdlavuza wesikhumba.
“Nakuba abantu abanebala elizothile bengekho engozini kangako kodwa nakubona akhona amathuba okuhaqwa yilesi sifo uma bengazinakekeli ngendlela efanele. Okwabo kuyingozi nangokuthi kubona isifo sijwayele ukuvela sesingene sagxila egazini lomuntu, sekungaselula nhlobo ukuselapha nokusinqanda ukubhebhetheka. Ngakho akekho umuntu ophephile; sonke kumele sizinakekele,” usho kanje.
Nazi ezinye zezindlela ongagwema ngazo ukuphathwa yilesi sifo:
– Lala ugqoke izimpahla ezimboza futhi zivikele isikhumba sakho njengesikibha noma yini kwangaphezulu okunemikhono emide.
– Ungasebenzisa imikhiqizo ye-sunscreen ezokuvikela ekushiseni kwelanga ikakhulu uma uzoba elangeni noma kube khona okwenzayo emnyango amahora amabili nangaphezulu.
– Faka isigqoko selanga uma uzohamba elangeni ukugwema ukushiswa yilanga okhakhayini nasebusweni.
– Hlala emthunzini ikakhulu phakathi kwa-10 ekuseni, kuya ku-4 emini ngoba yilapho ilanga elisuke lishisa kakhulu khona.
– Gqoka izibuko zelanga ukuze uvikele amehlo akho ekushiseni.
– Gwema ukuthamela ilanga ngoba kuyingozi esikhunjeni sakho.
“Into esiza kakhulu wukuthi uhlale uvakashela odokotela besikhumba ukuze bakuhlole ukuthi konke kusahamba kahle yini esikhunjeni sakho. Umdlavuza wesikhumba uhaqa abantu abaningi emhlabeni kodwa okuhle wukuthi siyagwemeka futhi selapheke uma sisheshe satholakala emzimbeni wakho,” kweluleka uDkt Sibisi.