Gada ungabolelwa umphako ungakawudli
UKUDLA ngenye yezinto ezijabulisa iningi labantu nokwenza kube mnandi kakhulu ukuzihlinzeka ngomphako uma uzoba nohambo olude. Lesi sikhathi sePhasika noma sinamaholidi amancane kodwa iningi labantu livakasha ezindaweni ezahlukene, abanye balibangise nasezinkonzweni. Lokhu kusho ukuthi nakanjani ngeke wasala umphako wendlela. Yize kunjalo kodwa lungonakala lubemuncu uhambo lwakho uma ubolelwa umphako ungakawudli.
Lokhu kwenziwa wukushisa kwelanga okweqile, izithako ezahlukene nokungawupakishi ngendlela umphako wakho. Umpheki ovelele uZandi Makhoba uveza ukuthi uhlobo lwesitsha nendlela opakisha ngayo ukudla kuyakubolisa uma ungakwenzanga ngendlela.
"Indlela opakisha ngayo ukudla nayo ingaba nomthelela ekutheni ukudla kwakho kusheshe kubole kungakashayi isikhathi sokudla. Kufanele usebenzise isitsha esivulekile kukhululeke, uma ikhona indlela ungasebenzisa ne-cooler bag okuyisikhwama esigcina ukubanda isikhathi eside," kusho uZandi.
Eqhuba uthe noma sewupakishe kahle hlela umphako ngokohambo lwakho uma uzokwenza amasemishi wakalele amahora amathathu futhi kube nezinto ongazozifaka nhlobo kuwona.
"Kubalulekile ukuzihlinzeka ngokudla okukwazi ukuthatha isikhathi eside njengombhako, amakhekhe nezithelo ezomisiwe. Okubalulekile ukwehlisa isikalo sikashukela uma uzobhaka.
“Uma uzokwenza isinkwa ungalokothi ufake utamatisi ngoba uzomanzisa isinkwa uphinde wenze kusheshe kube muncu ukudla,"kusho uZandi.
Isibhuklabhukla senkukhu uthe iningi labantu lisikhonzile kodwa sisheshe sonakale ngenxa yezithako eziningi ezisetshenziswa ezitolo.
"Kungcono ukuyibilisa ekhaya inkukhu yakho bese uyivuvuzela usawoti ukugcina imisoco ebalulekile nokubalekela ukufaka izithako.
“Ungabilisa namazambane kodwa nakho lokhu kudla akumele kuhlale isikhathi eside kungadliwe ngoba inyama yenkukhu iyashesha ukuzwela ukushisa bese iyonakala,"kusho yena.
Wengeze ngokuthi mikhiqizo eyenziwe ngobisi, irice, inyama enonile nethoswe ngamafutha, akulungile kungakuqubukisela ngezifo.
Ephetha uthe ngaphandle kokudla neziphuzo nazo kumele uziqaphele ngoba zingona uhambo lwakho ugcine uzithole sewugula.
"Iziphuzo ezine-acid ziyingozi ngoba zithatha amanzi emzimbeni ugcine sewuba nesiyezi, kungcono ukungaziphuzi. Amakinathi, izithelo namanzi kungakusiza uma unohambo olude," kweluleka uZandi.