Ziyabonakala izithelo zomzabalazo wabafundi
INCWADI: A seed of a dream
UMBHALI: Clive Glaser
ABASHICILELI: Jacana Media
BANINGI abadla izithelo zomzabalazo wabafundi bango-1976 kepha bakushaya indiva ukuzibophezela ekuthuthukiseni imfundo yabamnyama. Uyabonakala umthelela wokuzabalaza kwabafundi basesikoleni iMorris Isaacson High, uma kubuyekezwa izinga lemfundo yabamnyama namhlanje.
Encwadini ethi A seed of a dream, umlobi uClive Glaser uchaza ngomsuka wokubhikisha kwabafundi ngo-1976 kepha uwususa kude eminyakeni yawo-1956.
Umbhali ugxila emlandweni wesikole iMorris Isaacson High, esiseJabavu, eSoweto. Yilapho kwabheduka khona umbhikisho wango-1976 kepha umlobi uthi kwase kunesikhathi abafundi bekhononda.
Uqhathanisa imfundo yakudalo nombuso wangaleso sikhathi kanye nohulumeni wentando yabantu, lapho ehluza imithetho elawula ezemfundo yabamnyama. Okugqamayo ukungalingani kwezinga lempilo yabamnyama, ukungazibophezeli kwabaphethe ekuthuthukiseni imfundo yabamnyama.
Ngokusho komlobi umlando wesikole ufakazelwa ngabafundi asebashiya esikoleni kepha abazigqajayo ngaso. Uthi ukuthuthuka kweMorris Isaacson High kukhombisa ukuthi umzabalazo awuzange ube yizeleze kepha kuningi okusamele kulungiswe esikoleni.
Ekhasini 207, uClive ucaphuna omunye wabafundi ethi: "Abanye abantu babesibiza ngoModel C waseSoweto," uPumla Radebe.
Ungaphuthelwa umcimbi wokwethulwa kwencwadi ngoJulayi 20, eMorris Isaacson High ngo-2ntambama kuya ku-4. Ngeminye imininingwane ungaxhumana nabakwaJacana Media : rsvp@jacana.co.za
