Amaciko aseMzansi abuye nezindondo zama-Trace eZanzibar

AMA-TRACE Awards akulo nyaka aqhakambise ukukhula kwamaciko asezwenikazi i-Afrika kugqama omafikizolo abathathe izindondo ezibalulekile kulo mcimbi obubanjelwe eMora Resort, eZanzibar.

Umcimbi walo nyaka ubuwubufakazi bangempela bamandla omculo ekuhlanganiseni amasiko nabantu.

Ingoma Yonyaka iye kubafana ababili baseNingizimu Afrika ababengavimbeki uTito & Huppe abagoduke nendondo ngeculo labo elishisa izikhotha elithi Tswhala Bam, ingoma eshisa izikhotha zokudansa emhlabeni wonke.

I-albhamu Yonyaka iye kusihlabani saseNigeria u-Rema njengoba eqinisa ukubusa kwakhe nge-albhamu ehlonishwa kakhulu ethi Heis, umsebenzi wobuciko ohlanganisa ama-Afrobeats namathonya omhlaba. Uphinde wahlabana ngendondo ye-Male Artist of the Year.

Abaculi base-Ivory Coast abashisa izikhotha, u-Tam Sir & Team Paiya, bebevutha bhe ngesigqi esinamandla nge-Coup du Marteau bathola iBest Collaboration.

Ividiyo Yomculo ehamba phambili u-Meji Alabi onqobe ngombukiso omangalisayo we-DND ka-Remi, oqhakambise ukuthi amaqhinga okwenza okuhlukile awapheli.

Intandokazi yakuleli uMakhadzi isiphinde yafakazela ukuthi kungani ingenantanga kwezokudansa ithatha indondo ye-Best Dancer.

U-DJ ohamba phambili kube nguDJ Moh Green wase-Algeria owaletha ukushisa, waqinisekisa indawo yakhe njengo-DJ onethonya kunabo bonke onyakeni.

Isihlabani somdlalo wempilo yangempela kuTV u-Diamond Platnumz sisaqhubeka nokwenza izimanga emhlabeni wonke, sizuza lesi sicoco esihloniphekile sokuba yi-Best Global African Artist.

Umculi ohamba phambili we-hip hop uthathwe nguDidi B wase-Ivory Coast, owakhombisa ubuciko bakhe bokucula nokushelela kamnandi uma enza adume ngakho.

I-Best Female Artist ithathwe isihlabani somhlaba wonke u-Tyla waseNingizimu Afrika, ngobuciko bakhe obumangalisayo.

UTyler ICU ubonakale engumculi onethonya kunawo wonke kulesi sifunda (Southern Africa) kulo nyaka.