‘Ubekulindele’ ukuchuma kwengoma ohlukanise unyaka kwiGagasi FM
UKUQONDA ukuthi abantu bakuleli bathanda hlobo luni lwengoma futhi ekhuluma ngani, kwenze kwalula kuphrojusa womculo uBlaq Major ukukhiqiza ingoma ethi Sdakiwe Sbali, ahlukanise unyaka ngayo emsakazweni ozimele iGagasi FM.
Lokho kushiwo wuyena ekhuluma emcimbini wokumhalalisela ngempumelelo yengoma yakhe obuhlelwe yiGagasi, ePlatinum Belt Lounge, eMhlanga ngoLwesihlanu emini, lapho yena nomculi ampike kule ngoma uBless The Gentleman, benikwe umklomelo wokubahlonipha nokubahalalisela ngomsebenzi wabo omuhle.
Elandisa ngendlela okwenziwa ngayo le ngoma engenye yezishisa izikhotha ezweni okwamanje, uBlaq Major uthe le ngoma ize emva kwempumelelo yengoma yabo ethi Dali.
“Kuthe sekuchume leyo ngoma, ngase ngitshela uBless ukuthi asenze enye ingoma ezojabulisa abantu ngoDisemba, nezosiza ukuthi abantu baqonde ukuthi asifuniseli ngomculo esiwenzayo, singagqami ngengoma eyodwa kuphela. Ngamthumelela isigqi, ngamcela ukuthi ahlanganise ivesi, nangempela kwabanjalo njengoba senibona kunjena namhlanje,” kusho uBlaq Major.
Eqhuba, ubonge kakhulu uMasterKG ngokumnika ithuba lokusebenza naye, into athi yenze wathola umsindo othandwa ngabantu njengoba bese kuyisikhathi eside ekhiqiza izingoma kodwa kungachumeki ngendlela osekwenzeka ngayo manje.
Omunye wabaphathi beGagasi FM uMinenhla Dlamini uthe kuhlale kubajabulisa ukuhlangana nabaculi abasuke bedle umhlanganiso wengoma ehlukanisa unyaka esiteshini sabo, ikakhulu ngoba uhlelo abalusebenzisayo lokuyiqoka luhambisana nokufiswa nokuthandwa ngabalaleli babo.
UBlaq Major waseNtuzuma, igama lakhe lokuzalwa wuThamsanqa Mpanza, bese kuthi uBless The Gentleman waseMthunzini, igama lakhe nguSibusiso Zondo.