UMbuso Khoza ubambene noKabza kumaSama

UMLINGISI woMkhokha The Curse, uMbuso Khoza, ungomunye wamaciko azihola phambili ngokuqokwa kumaSouth African Music Awards (Sama) alo nyaka.

Abaqokiwe bamenyezelwe emcimbini obuseGallagher Convention Centre, eMidrand, eGauteng ngoLwesine.

Leli ciko elidabuka eShowe futhi elilingisa indawo kaMaphalala kulo mdlalo okhonjiswa kuMzansi Magic phakathi nezinsuku ngo-8.30 ebusuku, liqokwe emunxeni weBest Produced Album, Best Traditional Music Album neBest Engineered Album ngecwecwe iShaka iLembe Soundtrack Album Volume 2 (Original Music From the Shaka iLembe TV Series).

UMbuso ubambane kwathula umoya noKabelo "Kabza De Small" Motha ngeminxa emithathu umuntu ngamunye. UKabza, owayebadlula bonke nyakenye ngokuqokwa, ungene emunxeni we-Album of the Year, Best Motsweding Amapiano Album nakwiRadio 2000 Duo/Group of the Year.

Obaqwaqwade emakhanda nguTyla Laura Seethal oqokwe eminxeni emihlanu. UTyla uqokwe kwiSampra Best Album, Ukhozi Female Artist, Santam Newcomer, Best Pop Album neBest Collaboration.

KwiBest Maskandi Album kuqhathwe Inkosi Yamagcokama, Sminofu, Ntencane, uGatsheni noMthandeni SK. KwiBest Male uGatsheni, Kelvin Momo, Daliwonga, De Mthuda noPriddy Ugly. KuKhozi FM Female kutholene uTyla, Lwah Ndlunkulu, Brenda Mntambo, Lordkez noXolly Mncwango. KwiBest Contemporary Faith Music Album kuboshelwe uXolly Mncwango, Brenden Praise, We Will Worship, Pastor Namba ne3C Live. NakwiBest Dance Album kuminyene utshumo njengoba kuqhathwe uThakzin noMorda, Dlala Thukzin, Zakes Bantwini, DBN Gogo noSculptured Music.

Oyisikhulu esiphezulu kulo mqhudelwano wezindondo, uNhlanhla Sibisi, uthe ujabule kakhulu ngamaciko aqokiwe ngoba aveza kahle ubuciko nekhono eliphekwa kuleli. Obephathiswe uhlelo uLuthando "Lootlove" Shosha weMetro FM umemezele ukuthi abawinile bazodalulwa emcimbini ozoba kule ndawo ngoNovemba 3.