Bathembisa lukhulu emgubhweni weParis yodumo
ULWANDILE "Lwah Ndlunkulu" Mtshali waseHluhluwe noHlosiwe "DJ Hlo" Mthalane, bathi zonke izindlela zibheke endaweni yaseMdletsheni, KwaHlabisa ngoMgqibelo.
UDJ Hlo uthe uZulu awuhlangane uphikelele kulo mcimbi obizwa nge-IParis: Song of the Year Celebration kusukela ngo-9 ekuseni.
"Abantu abalindele into yamehlo. Bazobhema bakholwe ngoba ngibophele izingoma zangempela. Abantu ngeke bawuvale umlomo."
Eqhuba uDJ Hlo uthe izithameli zizobona uDJ osekhule kakhulu njengoba ekwazile ukumelana nabo bonke ubunzima ake wabhekana nabo kule ndima kaqedisizungu.
"Ngithi nje abantu abalindele lukhulu futhi okuhle ngimatasatasa e-studio, ngipheka ingoma entsha engizovula ngayo unyaka. Bengicela abantu bayeseke kakhulu njengoba sekuyimi ngedwa uDJ osemele abesifazane emicimbini emikhulu njengalo," kusho le ntokazi eyake yahlukanisa unyaka emsakazweni Ukhozi FM ngo-2021, ngengoma ethi Isibani futhi yahlomula ngendondo yeBest Star Female DJ of the Year in Africa kumaShinning Star Africa Awards nyakenye.
ULwah Ndlunkulu, odume ngengoma ethi Eyami nethi Ithuba, uthe umema wonke umuntu "ukuba sizobungaza ukuthi iParis ihlukanise unyaka."
Le ngoma kaMthandeni SK, ehambisana noLwah Ndlunkulu, seyibukwe amahlandla angaphezu kuka-12 million kuYouTube, inama-streams angaphezu kuka-6 million, iwunombolo 7 kwiSA Airplay Rams Chart, ishaye i-platinum.
Ibuye yaqokwa emisakazweni eminingi kodwa yahlukanisa unyaka kwiNongoma FM, Newcastle FM nakwiKasie FM, eGoli.
Lezi zintokazi zizobe zishiyelana inkundla noDJ Tira, Dlala Thukzin, Thinah Zungu, Jaiva Zimnike, Sminofu, Imfezemnyama, Shwi, Mtekhala, Thokozani Langa, Gadla Nxumalo, Sgwebo Sentambo, Njabulo Langa, Songqongqo, Ama-NND, Omacekeceke, Mdumazi, Mgojeli, Mjabulisi, Mroza Fakude, Mkhathazi, Ali Mgube, Skhenqe Biyela nabanye abaningi.
Uhlelo lomcimbi luzobe luphethwe wuNgizwe Mchunu, MC Tshatha, Welcome Ntombela noPhakelumthakathi.
Phakathi kwabaxhasi abaseke umcimbi kubalwa i-SABC1, Arbiter, Cutty, Dobbs neDurban Media House.