Inkosi Yamagcokama iqwaqwade omaskanda kumaSatma

UMCULI waseMsinga, uScebi "Inkosi Yamagcokama" Dlamini, ukhale wemuka nendondo yeBest Maskandi Artist/Group kumaSouth African Traditional Music Achievement (Satma) Awards abeseJesus Dome (DCC), eThekwini ngoLwesihlanu.

Inkosi Yamagcokama ihlabane ngengoma yayo esihloko sithi Home Alone, iqumba phansi uSaliwa Ndunakazi wengoma ethi Ilawu LikaMaGumede, uNdoni Ndunakazi wengoma ethi Ingoma Yami neThwasa Lekhansela ebeliqokwe ngengoma ethi Kawungodli.

Izinkabi Zezwe, uBig Zulu noSjava, ziphume phambili emkhakheni weMost Voted Song of the Year ngenoni lazo elithi Umbayimbayi.

Usonkondlo waseNkandla, uKwazi Nsele, ubaqunbe phansi ozakwabo kwiBest Indigenous Poet.

Iqembu laseHowick, iMC Records KZN, lidle umhlanganiso emnxeni weBest Traditional Collaboration.

Iqembu lesicathamiya, iBergville Green Lovers, libaqwaqwade amakhanda kwiBest Traditional Acapella Artist/Group.

UKing Nuba ubabhonye bonke abedlana nabo imilala kwiBest Traditional Social Media Influencer.

Inkakha yomculi we-reggae, uPhumi Maduna, inqobe indondo yeBest Reggae Artist/Group.

Umsakazi weKwekwezi FM, uMawaza Kabini, uhlule ngisho abasakazi bakaSigiya Ngengoma kuKhozi FM noGudlabatshakazi woMhlobo Wenene, kwiBest Traditional Music/SABC Radio Presenter.

Indondo yeBest Praise Singer ihambe noLizo Ndobe.

Iqembu lomgxobanyawo, iMpumelelo, lihambe phambili kwiBest Mbhaqanga Artist/Group.

UMamakie Motlagelwa ubahlule bonke abeqokwe nabo kwiBest Upcoming Artist/Group.

U-Eves Manxeba uthathe umklomelo weBest Afro Soul Song. Umsakazi uSilulami Dumza uzidlele amahlanga emkhakheni weBest Traditional Music Community Radio Presenter.

USandile Masilela uwine eqoqweni leBest African Jazz Artist/Group. UBalungile Shezi uqengqeleze phambili kwiBest IsiXhosa Artist/Group.

Ezicukuthwaneni ebezikhona kubalwa umlingisi woZalo, uCebo “Captain Nyawo” Mthembu, inyanga yaseThekwini, uZamokwakhe “King Bhaka” Nzama, owayengumsakazi woKhozi FM, uNgizwe Mchunu, umsakazi weGagasi FM, uPenny Ntuli nabanye.