ISIPHALAPHALA sikasaziwayo u-Inno Morolong ozoba seThekwini kule mpelasonto Isithombe: SITHUNYELWE
UVEZA ukuthi usekulungele ukungena eringini u-Inno Morolong okumele abhekane no-Ashleigh Ogle owaduma kakhulu ngokuba intombi yomunye womrepha wakuleli.
U-Inno ongomunye wosaziwayo uveza ukuthi ubezilolonga kanzima elungiselela lempi ehlelwa iMandela Foundation ngokubambisana ne-International Boxing Association engo-Ephreli 21 e-International Convention Centre, eThekwini.
Yize kunjalo u-Inno uveza ukuthi nezinkinga azizibekile phansi nasola ukuthi zizama ukuphazamisa umoya wakhe.
"Kuningi okwenzeke empilweni yami selokhu kwamenyezelwa lempi. Kuvalwe nekhasi lami lika-Instagram.
“Bekumele ngiphinde ngibhekane nezinye izinkinga ezithinta mina futhi engingathandi ukukhuluma ngazo.
“Ngibona sengathi konke lokhu kuhambisana nokuhlaselwa yimimoya," kusho u-Inno kwisitatimende esishicilelwe iKwathole.
Uqhubeke ngokuthi ufuna ukukhombisa umhlaba wonke ukuthi akayena nje owesifazane wesimanje nontekenteke, kodwa uqinile futhi unamandla.
Ngaphandle kwalempi u-Inno waziwa nangezinto ezahlukene okubalwa imfashini, amabhizinisi nokunye adume ngakho ikakhulukazi ezinkundleni zokuxhumana.
Related Topics: