KUBATSHAZWE ukuba mncane kukankosikazi wesihlanu kaMusa Mseleku ngemuva kokuthi uMzansi Magic uveze isikhangiso esiqinisekisa ukuthi lolu hlelo lukhuza ibuya ngenyanga ezayo.
Isizini yesishiyagalombili yohlelo izoqala ngoJanuwari 22. Kuzokhonjiswa iziqephu ezimbili ngesonto njengoba isizini iqukethe iziqephu ezingu 24.
Kuyona kulindeleke ukuthi amakhosikazi nababukeli bathulelwe uSamkelisiwe Khwela njengonkosikazi omusha.
Isolezwe like labika ukuthi umakoti usefikile emagcekeni akwaMseleku.
Lona leli phephandaba, liphinde labika ukuthi uMseleku uke wangeniswa esibhedlela kuthiwa akamuhle empilweni kodwa kwabuye kwavela ukuthi udedelwe ngemuva kwezinsukwana.
Esikhangisweni kuvela konke njengokubika kweSolezwe njengoba uMseleku avela evakashelwa amakhosikazi akhe esibhedlela.
Kuphinde kuvele eshuthe nawo amakhosikazi nezingane ekhona noSamkelisiwe.
Ekhuluma ngokuzokwenzeka kulolu hlelo esitatimendeni esakhishwa iMzansi Magic waveza ukuthi kuningi okwenzekile beqopha nokudale ukuthi babe neziqephu abebengajwayele ukuba nazo.
“Lezi ziqephu zizovumela ababukeli ukuthi babone uhambo olude esiqhubeka nalo njengomndeni. Kulokhu isiqephu ngasinye sizogxila empilweni kankosikazi ngamunye nabo bonke abayingxenye yohlelo, nokulapho kuzobonakala khona izinkinga, injabulo nokunye okwenza lolu hlelo lushiye ababukeli bebambe ongenzansi njengoba lushukumisa isiqephu ngasinye.”
Ababukeli bohlelo ezinkundleni zokuxhumana bathe sebelubheke ngabomvu njengoba kucaca ukuthi luzobe luqukethe okuningi.
UNosipho Fuze uthe: “Unesibindi lona wesifazane mina ngingambukelwa ubani uMaYeni noMaNgwabe? Nangu noMaCele wi ayingeke.”
UThembeka Nana MaMkhize Mnguni uthe :“Angikaze ngijahe uJanuwari kanjena Nkosi yami, angisenandaba nendlala yawo”.
Related Topics: