UMPUKANE uzobonakala emdlalweni weNetflix, elingisa indawo kaKhanyi Mbau Isithombe: FACEBOOK
USOMAHLAYA osanda kuphelelwa wumsebenzi kwiGagasi FM, uSandile "Mpukane" Makhanya, zimhambela kahle emkhakheni wokulingisa.
UMpukane, obuye aziwe ngelikaFlaimotion, ubengakaqedi nenyanga kade elingisa emdlalweni wethelevishini kuMzansi Magic, iKiller Front Page, lapho abedlala khona indawo kayise kaPalesa.
Njengamanje uMpukane umatasatasa nokushutha komunye umdlalo ozokhonjiswa kuNetflix osihloko sithi The Khumalos.
Uthe uzobe elingisa indawo kayise kaKhanyi Mbau kulo mdlalo.
Uthe lo msebenzi uwutholelwe yinkampani angaphansi kwayo.
“Ukulingisa kufuna ube ne-agency ezokwazi ukukutholela umsebenzi nawe bese uba wumuntu onogqozi, uzinikele nje ngalo lonke ikhono. La kwi-TV ayikho indawo encane. Bekuyiphupho lami lokuthi nami ngivele kuNetflix, engibona ukuthi isazongivulela amanye mathuba.”
"Abantu basazongibona nje kakhulu nakwi-Podcast yami iBasement Podcast with Sandile M."
Ngaphambi kokuba ashiye kwiGagasi FM, uMpukane wathi usezogxila kakhulu ekulingiseni nasemahlayeni.
Uthe ucabanga ukuthi usebenze ngokwanele emsakazweni, manje usefuna abantu bazi amanye amakhono ngaye.
"Ngiyalibonga kukhulu iGagasi FM ngethuba elinginikeze lona. Ukuthi nje sengifuna ukuvelela nakule eminye imikhakha."
UMpukane akasiyo imfundamakhwela ekulingiseni kwithelevishini njengoba eqale kwiJudge Khambule kwiMoja Love nakwiMbewu The Seed ku-e.tv.
Ubuye wadidiyela ifilimu emfishane ekhuluma ngempilo yakhe.
Related Topics: