Abaculi baseKZN bathathe izindondo ezibalulekile kumaSama

ABACULI basenhla nesifundazwe saKwaZulu-Natal, uGatsheni wasoPhongolo noMthandeni Manqele “Igcokama Elisha” waKwaHlabisa, bakhale nezindondo ezibalulekile emcimbini amaSouth African Music Awards.

Emcimbini wangoMgiqbelo, obuseGallagher Convention Centre, eMidrand, uGatsheni ukhale wemuka nezindondo ezimbili; iLesedi FM Male Artist of the Year neBest Maskandi Album.

UMthandeni okuyindondo yakhe yokuqala kulo mcimbi, uthathe indondo evotelwayo iMotsepe Foundation Record of the Year.

Ekhuluma ngokuthola kwakhe lezi zindondo uGatsheni, uthe uphelelwa amazwi okubonga ngempumelelo yakhe emculweni.

“Ngibonga okokuqala ngithola indondo yeBest Maskandi Album, kube yinjabulo kimi. Kodwa okube kukhulu ukuthola indondo enkulu kakhulu, ye-Best Male artist of the year, ngiyathobeka. Ngibonge abantu abahambe nami kule ndlela. Njengomculi bekuhlezi kuyiphupho lami ukuwina indondo yamaSama, njengoba bengihambele zona lezi zindondo ngempela sibuye nazo zombili,” kusho uGatsheni.

Kulo mcimbi uKabza de Small noTyala kube ngabaculi abathathe izindondo eziningi.

UTyla uthole izindondo ezintathu okukhona kuzo i-Female Artist of the Year, Newcomer of the Year neBest Pop Album.

UKabza De Small uthole indondo ye-Album of the Year, Duo/Group of the Year neBest Amapiano Album.

Abanye abawinile kubalwa uBrenda Mtambo othole indondo ye-Best African Adult Contemporary Album, uLwah Ndlunkulu yena uhlabane ngeye-Best Afro-pop Album, umrepha uPriddy Ugly, uthole indondo yakhe yokuqala ye-Best Hip Hop Album.

Emculweni wokholo u-Omega Khunou uthole indondo ye-Best Traditional Faith kanti uXolly Mncwango, ukhale wemuka neye-Contemporary Faith Music.

UMinnie Dlamini uyena obephethe uhlelo, unconywe kakhulu ngendlela abeluphethe ngayo.