Ukhala ngengcindezi uBrenda Mtambo
UKUBA wusaziwayo nokuba nezinto ezinhle empilweni, abantu abaningi kubenza bagcine sebekhohlwa wukuthi nabo bayabhekana nezimo zempilo ezinzima.
Intandokazi yomculi wakuleli, uBrenda Mtambo waseMlaza wamangaza abaningi ephumela obala eveza ukuthi ubanjwe wukhwantalala, okuyinto abantu abayithatha ngokuthi ngeyabathile.
Ekhuluma naleli phephanda uBrenda, uveze ukuthi umculo umelaphe kakhulu ngesikhathi ebhekene nale nkinga, okuyinto aseyisebenzisela ukwelapha abantu ababhekene nesimo esifanayo.
Lo mculi ukhiphe i-albhamu ethi Sane equkethe izingoma ezehlukene zokwelapha umphefumulo. Ngaphandle kwale albhamu unomcimbi ozoba sePlayhouse eThekwini ngoNovemba 11, obizwa ngokuthi A Decade Experience kwazise uneminyaka eyishumi agcina ukukhipha.
"I-albhamu ikhuluma ngokuba sesimweni sengqondo esikahle njengoba nakule nyanga sikhuluma kakhulu ngezifo zengqondo. Umculo yinto ongayisebenzisa ukulalela ingqondo yakho ngoba umyalezo osemculweni ungakwelapha engqondweni.
Kwisipiliyoni sami.... umculo yiwona ongiphilisile. Ngiyazi ukuthi umculo ungakwenzelani ngoba uyakwazi ukubona nezinto ngendlela ehlukile," kusho uBrenda.
I-Sane enezingoma eziningi esezithandwa ngabantu, yize iyintsha, ezinye zazo kubalwa ethi Enza kwenzeke, Uyangazi nezinye eziningi esezidumile nasemsakazweni.
U-Brenda uke wasebenza nabaculi abahlukene, okubalwa neJoyous Celebration abedumile kuyo. Ukuphumelela kumenza angakhohlwa lapho aphuma khona futhi abambisane namanye amaciko.
Emcimbini wasePlayouse uzosebenza nekhwaya yaseMlaza, i-Afro Soul, uNtencane namanye amaciko enza imsebenzi eyahlukene.
"Ngizogubha iminyaka eyishumi ngisendimeni yomculo futhi ngicula ngizimele. Ngifuna ukubonga ngale albhamu nangothando abantu abangikhombise lona.
Ukuzokwethula le albhamu ekhaya lapho ngiqale khona, kusho lukhulu nakimi ngoba abantu baseThekwini bangeseka ngiqala ngisacula esikoleni. Ngicela abantu bangaphuthelwa sizojabula sonke sivuselelane," kusho uBrenda.
Ephetha uthe uyethembisa ukuthi abantu bazozizwa zonke izingoma abazithandayo nezinye eziningi..
Amathikithi omcimbi ohlelwa iBusa Music ngokubambisana nePlayhouse, aseyatholakala eWebtickets.
