UMQEQESHI waMaZulu FC, u-Arthur Zwane, ecobelela omunye wabadlali bakhe ngamaqhinga uTeboho Mashego, bezilungiselela umdlalo wanamuhla ebusuku weBetway Premiership, e-Old Peter Mokaba Stadium, ePolokwane Isithombe: BACKPAGEPIX
AMAZULU aqoke ukuyikhohlwa eyokukhishwa kwiNedbank Cup njengoba ebegxile ekuqoqeni amaphuzu emidlalweni elandelayo yeBetway Premiership.
USuthu luzobhekana neSekhukhune United namuhla ngo-7.30 ebusuku, emdlalweni wasekuhambeni wePremiership, e-Old Peter Mokaba Stadium, ePolokwane.
AmaZulu azodlalala neSekhukhune nje, ngempelasonto edlule awashiswe ijezi yiMarumo Gallants ngo 1-0 koweNedbank Cup Last 16. Kulo mdlalo aboSuthu bakhale ngezinqumo zikanompempe, uThando Ndzandezeka.
Omunye wabaqeqeshi baMaZulu, u-Arthur Zwane, uthe sebebheke ukugcina umgqigqo emidlalweni yePremiership.
“Ngumdlalo ongelula lona esizowudlala uma ubheka ukuthi sibuya emdlalweni onzima womkhumulajezi esihlulwe kuwo ngempelasonto. Nokho sidlulile kulokho manje, kumele sikhohlwe okwedlule. Sesibheke ukuyobhekana neSekhukhune esaziyo ukuthi ngeke kube lula ukubhekana nayo. Basishaya ekhaya (emzuliswaneni wokuqala), ngakho sizokulwela ukugwema ukudedela amagoli angenasidingo kulo mdlalo wasekuhambeni. Kubalulekile ukuthola imiphumela emidlalweni yasekuhambeni, okuzosiza ukubuyisa ukuzethemba kubadlali bethu ngemuva kokuhlulwa emdlalweni wakamuva kwiNedbank,” kusho uZwane.
Njengoba imidlalo yePremiership ithothana eduze, uZwane ubona kuzoba nzima kodwa bazokugwema ukwenza izinguquko eziningi esikimini ukugcina umgqigqo.
“Kubalulekile ukubhalansisa izinto ngokunika abadlali abehlukene ithuba kodwa kuyinselelo ukushintsha indlela yethu yokudlala ngoba sisazama ukubeka iqembu endaweni efanele ngokwendlela nesitayela sethu sokudlala. Yize sifuna imiphumela nokwenza bonke abadlali bajwayele indlela yethu yokudlala kodwa asifuni ukwenza izinguquko eziningi. Ngakho sizozama ngakho konke okusemandleni ukugcina abadlali bethu besesimeni esikahle njengoba sisazodlala neMagesi (ngoMgqibelo) okungumdlalo ongeke ube lula kwazise ayisekho imidlalo elula ngalesi sikhathi sesizini,”usho kanje.
USuthu luqoqe amaphuzu eyisikhombisa emidlalweni emithathu yePremiership, eliyidlale ngaphambi koweNedbank, neGallants.
Related Topics: