ABADLALI beKaizer Chiefs bejabulela igoli likaGlody Lilepo ngesikhathi benqoba iStellenbosch FC ngo 1-0 isithombe: BACKPAGEPIX
Stellenbosch FC (0) 0
Kaizer Chiefs (1) 1
IKAIZER Chiefs iphinde yathatha amaphuzu amathathu kwiStellenbosch FC, iyinqoba ngo 1-0 emdlalweni weBetway Premiership obuse-Athlone Stadium, eKapa ngoLwesihlanu ebusuku.
Igoli elinqobise Amakhosi lishaywe nguGlody Lilepo umdlalo usanda kuqala.
Bekuyigoli lokuqala lalo mgadli waseDemocratic Republic of Congo ojoyine iChiefs esuka kwiValenciennes yaseFrance ngasekupheleni kwenyanga edlule.
Bekungokwesibili Amakhosi edla iStellies koweligi kule sizini, kwazise ayithela phansi ngo 2-1 eFNB Stadium ngasekuqaleni kukaJanuwari.
Amakhosi abedinga amaphuzu amathathu kulandela ukubambana ngo 2-2 naMaZulu FC ngoLwesibili.
IStellies ibigcine ibambene neSekhukhune United ngo 1-1 kowakamuva weligi ngempelasonto.
Kusheshe kwazihambela kahle ezikaNasreddine Nabi zithola igoli ngomzuzu wesine kulandela ikhona.
UGaston Sirino ugobe ibhola elihle engakwesokudla, lathola uLilepo engamakiwe ebhokisini, walibeka phakathi ngekhanda.
Womabili amaqembu akabange esawathola amathuba amahle esiwombeni sokuqala, egcina ngokuzama Amashova engaphandle kwebhokisi kodwa engabahluphi onozinti.
Umdlalo uthe ukuvuleka esiwombeni sesibili kodwa kwangabe kusangena magoli, iChiefs yemuka namaphuzu.
Lo mphumela ubeke Amakhosi endaweni yesine ngamaphuzu angu-25 emidlalweni engu-17.
IStellies yehlele endaweni yesishiyagalombili ngamaphuzu angu-20 emidlalweni engu-14.
IStellenbosch isizotholana phezulu nePolokwane City kwiLast 16 yeNedbank Cup ngoLwesine, iChiefs ibhekane neChippa United ngoFebhuwari 15,
Komunye umdlalo weBetway Premiership obuseMoses Mabhida Stadium, AmaZulu FC aguqise iMarumo Gallants ngo 2-0.
Igoli lokuqala loSuthu lishaywe nguRowan Human ngomzuzu ka-42, elesibili lavalelwa nguWayde Jooste ngoka-60.
AmaZulu akhuphuke ayohlala endaweni yesithupha ngamaphuzu angu-23 emidlalweni engu-17.
IGallants isasendaweni ka-13 kwi-log ngamaphuzu angu-15 emidlalweni engu-16.
Lawa maqembu azophinde ahlangane koweLast 16 kwiNedbank Cup ngoFebhuwari 15 eSeisa Ramabodu Stadium, eBloemfontein.