UMDLALI osemncane weSuperSport United, uSiyabonga Ndebele, evimba u-Andiswa Sithole waMaZulu emdlalweni weBetway Premiership eMoses Mabhida Stadium, eThekwini, ngoMgqibelo Isithombe: BACKPAHEPIX
UMQEQESHI weSuperSport United, uGavin Hunt, unethemba ngokuqina kokhakhayi kubafana bakhe akholwa wukuthi bashaye into ecokeme behlulwa ngaMaZulu emdlalweni weBetway Premiership eMoses Mabhida Stadium, eThekwini, ngoMgqibelo ebusuku.
EzikaHunt zikhale ngaphansi ngo 2-1 kuMaZulu emdlalweni ezidlale kuwona ibhola elihle, zayeka nenqwaba yamathuba okushaya amagoli.
ISuperSport edonsa kanzima kule sizini, ibalwa namaqembu ahlulekayo ukushaya inethi kule sizini ka-2024/2025. Isashaye amagoli ayisithupha kuphela emidlalweni engu-15 phezu kokushaya ngabagadli abaseqophelweni eliphezulu okukhona kubona uTerrence Dzvukamanja waseZimbabwe, Samir Nurkovic osanda kulijoyina iqembu noBradley Grobler osephinde walimala. Nakuba inenkinga yamagoli, iSuperSport idedele uTashreeq Morris osayine kwiKaizer Chiefs kusaphele izinyanga ezimbalwa eyijoyinile. UMorris ushaye amagoli amabili kuMatsatsantsa okubalwa kuwona alishaye behlula iChiefs emdlalweni weligi.
UGunt akakufihlanga ukuphoxeka kwakhe ngendlela abahlulwe ngayo eThekwini.
“Kuyadumaza uma uqeda umdlalo, ikakhulukazi owasekuhambeni wakhe amathuba amaningi, wangena kaningi ebhokisini, ekugcineni bathola amaphuzu amathathu. Abadlali badikibele kodwa ngiyakuqonda lokho ngoba sidlala kahle kule sizini kodwa imiphumela ayiveli. Kodwa kwesinye isikhathi lezi zinto ziyenzeka,” kusho uHunt.
“Sidlale ibhola elihle, sakha inqwaba yamathuba. Lokhu bekusukela endleleni enhle esidlala ngayo, hhayi emaphutheni eqembu ebesidlala nalo. Amagoli amabili asingenele abesuka emaphutheni ethu. Bekungelethu ibhola, saphisana ngalo. Kusuka lapho bashaya amagoli bengaphandle kwebhokisi. Sinabadlali abaningi abasebancane, ngikholwa wukuthi bazofunda kulokhu. Ngokuhamba kwesikhathi bazovuthwa.”
Kubadlali abasebancane baMatsatsantsa kubalwa uNeo Rapoo, Siyabonga Ndebele, Ime Okon, Siviwe Magidigidi nabanye.
ISuperSport isendaweni ka-10 kwi-log yePremiership ngamaphuzu angu-16 emidlalweni engu-15. NgoLwesithathu izogadulisana nomakhelwane bayo, iMamelodi Sundowns koweligi eLucas Moripe Stadium, e-Atteridgeville, ngo-7.30 ebusuku.
Related Topics: