ABADLALI be-EZemvelo Women’s FC bebhiyoza izolo ngemuva kokukhushulelwa kwabo esigabeni seHollywoodbets Super League ngemuva ngokuguqisa iRamatlaohe Ladies yaseLimpopo, kowandulela owamanqamu eSafa Sasol League National Play-Offs, eKnysna, eWestern Cape Isithombe: SAFA X
LINGENE ligijima izolo kwiHollywoodbets Super League, iqembu laKwaZulu Natal, i-Ezemvelo Women’s FC, ngemva kokushaya iRamatlaohe Ladies yaseLimpopo ngo 1-0 emdlalweni owandulela owamanqamu weSafa Sasol League National Play-Offs, eLoerie Park Stadium, eKnysna, eWestern Cape.
Amaqembu amabili aphumelele kweyandulela owamanqamu, yiwona asekhushulelwa esigabeni seSuper League ngaphambi kokuyodlala owamanqamu wokukhipha ompetha bakazwelonke beSasol League.
Igoli eliqinisekise ukuthi Ezemvelo zingena kwiSuper League, livalelwe phakathi ngu-Amanda Mkhize ngemuva kwebhola alibekelwe nguSlindile ‘Mshana’ Ngubane ngomzuzu ka-58 esiwombeni sesibili.
I-Ezemvelo izobhekana ne-UCT yaseWestern Cape kowanqamu, yona enenebule iKovsies yaseFree State ngo 4-0. Owamanqamu ukusasa ngo-11 emini, eLoerie Park Stadium, emdlalweni ozosakwaza bukhoma ku-SABC 1.
Iqembu elizodla umhlanganiso kowamanqamu lizohlabana ngendebe nesheke lika-R200 000 nezindondo zegolide, elizolala isibili lithole umthobanhliziyo ka-R100 000 nezindondo zethusi.
I-Ezemvelo KwaZulu-Natal imele iKZN kulo mqhudelwano obekuqhuthana kuwona ayisishiyagalolunye avela ezifundazweni ezihlukene zaseNingizimu Afrika. Ngokukhushulelwa kwiSuper League, i-Ezemvelo ivale isikhala somkhaya iLindelani Ladies, esanda kugawulwa yizembe ngemuva kwesizini idlala kulesi sigaba esikhulu sebhola labesifazane kuleli.
Nakuba isazodlala owamanqamu kusasa kodwa impumelelo ye-Ezemvelo eqeqeshwa nguNkosingiphile Maphumulo, isho lukhulu ikakhulu njengoba ibidlala okokuqala kule midlalo kazwelonke yokuhlunga.
Leli qembu laseMlaza, eliphethwe nguSiphindile Sithole owayengumdlali weDurban Ladies eminyakeni edlule, lisungulwe ngonyaka odlule ngemuva ngokuthenga isitifiketi seWhite City Ladies yaseMpangeni. Ngesizini yokuqala laqeda endaweni yesikhombisa kwi-log ka-Stream B.
Related Topics: