UZANDILE Malinga weStarline Boxing Promotions, Immanuel Mutavhatsindi, Nosiacwase Dube-Mutavhatsindi, Hlengiwe Dladla weHle-Jobe Promotions noNomvelo Magcaba-Shezi weMvelo Boxing Promotions Isithombe: SITHUNYELWE
UZOYILONDOLOZELA imfundo yendodakazi yakhe imali ayithole ngokuphuca uThema Zuma ibhande le-SA Female Jr Bantamweight uNosiacwase "Golden Girl" Dube-Mutavhatsindi onqobe ngamaphuzu kungalindele muntu.
Le mpi ibiyingxenye yomqhudelwano wezimpi zabesifazane obungoLwesibili, eCity Hall, eMgungundlovu, obubizwa nge-The Rise of Woman in Boxing obuxhaswe wuMnyango wezeMidlalo, ubuCiko namaSiko esifundazweni iKwaZulu-Natal.
Ubuhlelwe ngokuhlanganyela yiMvelo Boxing Promotions kaNomvelo Magcaba-Shezi, Hle-Jobe Boxing Promotions kaHlengiwe Dladla neStarline Boxing Promotions kaZandile Malinga.
Ngaphambi kwale mpi, iningi belizitshela ukuthi uzozidlela amahlanga uZuma waseDududu owayenqobe lesi sicoco ngo-2023 ehlula uBathabile Ziqubu waseMnambithi.
Lokhu bekungenxa yokuthi ungene eringini esenqobe izimpi eziyisishiyagalolunye, uNosiacwase ocijwa ngumyeni wakhe, u-Immanuel Mutavhatsindi, esanqobe ezintathu kuphela.
Eringini uNosiacwase ozinze eFree State, akazange azithele ngabandayo njengoba ebelokhu ezikhiphe njalo izibhakela, ebekezelela odalimede abebejikijekwa nguThema.
Ngomzuliswano wesine umangaze abaningi egingqa uThema nokho ovuke wazithatha.
Alilahlekile kangakho leli bhande esifundazweni iKZN kwazise uyise kaNosiacwase, uMpiyakhe Dube oshone ngo-2022, udabuka eNtuzuma, eThekwini. Unina nguNompi Dube wase-Eastern Cape. Bafudukela eFree State esemncane ngenxa yokuthi uyise owayeshayela amaloli, wathenga umuzi eBethlehem.
UNisiacwase utshele Isolezwe ukuthi kufezeke iphupho leminyaka ngokunqoba leli bhande.
"Bengazi ukuthi abantu abaningi bebenganginike lutho ngaphambi kwale mpi. Ngisizwe wukukholelwa ezintweni ebengizenza ejimini nasemaphusheni ami," kubeka lo mshayisibhakela obuye abe umnikazi we-Elimthende Boxing Development Academy eseBethlehem.
Uqhube wathi: "Nginendodakazi, uSamkelo oneminyaka eyishumi. Ngimthanda kakhulu. Nezingubo ebengizigqokile eringini bezibhalwe igama lakhe. Imali engiyithole ngokuba ngumpetha ngizoyilondozela imfundo yakhe. Ngethemba nokuthi njengoba sengiwumpetha nabaxhasi bazoqhamuka."
UNosiacwase ubonge wanconcoza enkampanini yomyeni wakhe, iMSM Sports Management & Entertainment ngokumtholela le mpi. Le nkampani yaziwa kakhulu ngokutholela amabhokisa akuleli izimpi phesheya kwezilwandle ikakhulukazi eRussia.
Beziyisishiyagalombili sezizonke izimpi kulo mqhudelwano. Enye ebibhekwe kakhulu ngekaMapule "Thunder" Ngubane ongumpetha weSA Female Middleweight, oshaye ngamaphuzu uNomandithini Ndyambo kweyokungcweka. Kwenye uNomusa "Bozza" Ngema oyingqwele yele-SA Female Jr Featherweight, ushaye ngendlela efanayo uMatshidiso Mokebisi kuyo eyokungcweka.
Related Topics: