Eyebhande le-WBC ithwele ithemba lebhokisa laseKZN

UMSHAYISIBHAKELA wase-Eastern Cape, uSiyakholwa "One Way" Kuse (21) uzongena eringini kusasa eyolwela ibhande le-WBC ephethe amathemba kaThami Luthuli waseNkandla, ocuthele ukuthi ashiye ele-SA Strawwight.

UKuse ocijwa uZolani "Last Born" Tete, uzobhekana noBeavan "The One" Sibanda waseZimbabwe, empini yebhande elingaphethwe muntu le-WBC Silver Strawweight.

Le mpi iyingxenye yomqhudelwano weGolden Gloves Promotions obizwa ngeRivalry Reloaded oqala namuhla kusihlwa e-Emperors Palace, eGoli.

UKuse uphethe ibhande le-SA Strawweight alinqoba ngo-2023 eshaya uBangile Nyangani. Ngo-Agasti, ubeqala ukulivikela njengoba eshaye uMalakho Sobolo. Uphethe nele-ABC.

UMlandeli Tengimfene oyimenenja kaKuse noTete, e-All Winners Boxing Gym e-East London, utshele Isolezwe ukuthi ngoDisemba 15, iLast Born Promotions (okuyinkampani kaTete) izokwenza umqhudelwano e-Orient Theatre, e-East London. Uveze ukuthi uma uKuse enqoba kuSibanda, uzolishiya phansi elaseMzansi.

Uqhube wathi emqhudelwaneni weLast Born Promotions lizobe selibangwa nguLuthuli noMthokozisi Ngxaka naye ophethwe e-All Winners Boxing Gym.

"Amathemba kaNgxaka noLuthuli okulwela ibhande le-SA Strawweight alele ekutheni uKuse anqobe ngoLwesihlanu. Nakuba isibhakela siwuhlobo lomdlalo ongeke uluqonde kodwa asingabazi ukuthi uKuse uzonqoba ngoLwesihlanu," kubeka uTengimfene.

Ezilinganisweni zeBoxing South Africa (BSA) kwiStraweight, uNgxaka useqhulwini. Usanqobe izimpi eziyisishiyagalombili, wahlulwa kwezimbili, walwa ngokulingana kweyodwa. ULuthuli okleliswe kweyesibili, usanqobe eziyisikhombisa, walwa kwezimbili ngokulingana.

UTengimfene uphinde waveza nokuthi uTete usazobuyela ekubeni ngumshayisibhakela. Ngasekupheleni konyaka odlule umiswe iminyaka emine engasidlali isibhakela ngenxa yokutholakala egazini nesikhuthazimzimba esingavumelekile emuva kwempi yakhe noJason Cunningham ngoJulayi wango-2022, e-England.

Lesi sigwebo sizophela ngo-2026. Uzobe eseneminyaka engu-38.

"UTete uthi iminyaka ayisho lutho, ngeke aphoqwe izimo zomhlaba ukuthi ayeke umdlalo awuthandayo. Uthi uzosiyeka uma sekuthanda yena. Uthi ufuna ukuyeka isibhakela ngokuhloniphekile. Ukuqeqesha wakuqala ngemuva kokumiswa. Wayengeke avele ahlale angenzi lutho olumhlanganisa nesibhakela," kuchaza le menenja.

UTete wayengumpetha we-IBF World Junior Bantam ne-WBO World Bantamweight.