Isebe leZemidlalo, uBugcisa neNkcubeko ligqibe kwelokuba kubekho isithebe sengxoxo ukuze kuphicothwe imiba edla umzi kwezemidlalo.
Image: Pedro Mapelo/I'solezwe lesiXhosa
Kubethwe iintonga zomlomo kwanzima kwingxoxo ebingentlalontle kwezemidlalo eholweni ebeligcwele qhu edolophini eGqeberha ngenjikalanga yangoLwesibini kule veki. Isebe leZemidlalo, uBugcisa neNkcubeko ligqibe kwelokuba kubekho isithebe sengxoxo ukuze kuphicothwe imiba edla umzi kwezemidlalo. Phakathi kweendwendwe ebezimenyiwe bekukho abantu abaziwayo abaquka uMnu. Zola Yeye owayengumphathi weSpringboks, uDesiree Ellis oqeqesha aBanyana Banyana, uNatalie du Toit owabuya neembasa kwiOlimpiki noBarry Hendricks ongumangomeli weSASCOC.
Izithethi ezihloniphekileyo, nangona zenze iintetho zazo ngevidiyo, ibinguMnu. uLubabalo Oscar Mabuyane okhokela iMpuma Koloni nesekela mongameli uMnu. uPaul Mashatile. Umphathinkqubo ibinguMluleki Ntsabo ongumsasazi wezemidlalo kwiSABC nakwiDStv. Oyinkokeli yesebe, uNksz. uSibulele Ngongo, ugabule izigcawu ngentseni yayizolo ngokupha abadlali begalufa abasakhulayo izixhobo ezixabisa iR67 000, eHumewood Golf Club.
Evula ingxoxo izolo, uNgongo uthe isebe lakhe lihlaba ikhwelo ukuze kuqiniswe iinzame zokunikwa ulutsha amathuba alinganayo olunomdla emidlalweni ngokwahlukana kwayo. Zivumile zonke izithethi ukuba imidlalo sisixhobo esibalulekileyo sokubumba isizwe futhi siguqula ubomi babantu abatsha xa izinto zisenziwa kakuhle. Nakubeni ikhona inkqubela kwezemidlalo eMzantsi Afrika ukusukela ngo1994 – kodwa kuye kwacaca ukuba abantu abaninzi basanzinyelwe kwezemidlalo futhi abakwazi ukuthatha inxaxheba ngokupheleleyo ngoba kusekho iindawo ezingenawo amabala nezingenalo ululawulo olucacileyo olunceda kubekho utyalomali kwezemidlalo.
Abantu baseGqeberha babonise umdla wabo onzulu ngokuthetha phandle ngeengxaki abajamelene nazo eziquka ukunqaba kwenkxaso, ukonakala kwamabala, ukungabikho kwesikhokelo esicacileyo emidlalweni nokungabikho kwekhonkco lentsebenziswano phakathi kukaRhulumente wasekuhlaleni noluntu. Ukuze kubekho inkqubela ebonakayo, kuthiwe imidlalo mayibuyiselwe ezikolweni, abantu bokuhlala balukhuthalele uphuhliso neenkokeli zinikwe izakhono ukuze bakwazi ukulawula imidlalo ngendlela engenachaphaza.
Related Topics: