AmaZulu antywilisele iCape Town City anyukela kwindawo yesihlanu
Onwabile AmaZulu emva kokuba onzakalise iCape Town City ngamagowuli amabini eqandeni emdlalweni weBetway Premiership obubanjelwe eKing Zwelithini Stadium emalanga ngeCawe edlulileyo. Emva kokuntywilisela iCity esisisulu samaqela adlala kwiBetwa Premiership kwezi ntsuku, AmaZulu anyukele kwindawo yesihlanu.
Olu luphawu lomsebenzi omhle owenziwe nguZwane (Arthur) noVusumuzi Vilakazi ohambileyo ekuqaleni kweveki ephelileyo. Bathatha iintambo Usuthu lusokola emva kwesiqala esibi kwisizini eqhubekayo phantsi kukaPablo Matins owahambayo.
Nakubeni igoduke iphaca iCape Town City emva komdlalo wayizolo - kodwa yiyo eqale yankqonkqoza ezipalini zikaRichard Ofori. AmaZulu afumene ukuzithemba emva kokuvala amazibuko ekuqaleni komdlalo izihlandlo eziliqela iquqa iCity ebikhangela igowuli kwangoko emdlalweni. Akhokele phambili emva kokuba uElmo Kambindu efake igowuli lokuqala.
Kuyiwe kwixesha lokuphumela AmaZulu ehamba phambili ngegowuli elinye ebhodini. Isiqingatha sesibini sinike iCity eqeqeshwa nguMuhsin Ertugral ithuba lokuziphindisela ukuze ifumane oku kwenqaku elinye emdlalweni okungenani. Khange kube njalo, endaweni yoko uMoremi ufake igowuli lesibini emva kokunikelwa ibhola entle nguNkosikhona Radebe emzuzwini wamashumi amathandathu anesibini.
Bazamile ukulwa abadlali beCity ekuzeni kuphela komdlalo - kodwa akavuma ukuvula AmaZulu anukiselwa yindawo entle kwiBetway Premiership ukuba akwazile ukuqokelela amanqaku emidlalweni elandelayo. Emva komdlalo, uErtugral uvumile ukuba iqela lakhe loyisiwe ngoba khange likwazi ukumelana naMaZulu emdlalweni.